Lista preto di condicionnan general

Un negoshi no mag stipula condicionnan general pa loco. Condicionnan general ta stipulacionnan of clausulanan por escrito formula pa ta parti di un acuerdo of contract cu excepcion di stipulacionnan cu ta indica e esencia di rendimiento, manera por ehempel prijs. E ley di condicionnan general ta papia di usuario (negoshi) y contrapartido (consumido). E usuario den mayoria caso ta e negoshi cu ta stipula e clausulanan como parti di un contract. E contrapartido (consumido) ta esun cu lo mester acepta e condicionnan general cu ta aplicabel pa e acuerdo, sea por escrito of di otro forma, y hopi bes esaki ta e consumido.

Ley a pone reglanan pa stipulacion di condicionnan general. Ley tin un lista preto di condicionnan cu ta prohibi y pues no mag aparece den ningun contract.

Akibao ta sigui e lista preto di condicionnan general manera ta aparece den nos codigo civil buki 6, articulo 236. Lista preto di condicionnan prohibi:

  1. cu ta limita of exclui e derecho di e consumido pa exigi e prestacion (producto of servicio) cu e negoshi a priminti;
  2. cu ta limita of exclui  autoridad di e consumido pa disolve e contract manera regla den ley di contractnan reciproco (seccion 5: wederkerige overeenkomsten);
  3. cu ta limita of exclui e consumido di e competencia cu ley ta dune pa suspende cumplimento of cu ta duna e negoshi un poder mayor cu loke ley ta dune pa suspende;
  4. pa e negoshi mes determina si el a keda sin cumpli cu un of mas compromiso, of cu si e ehecucion di e derechonan cu e consumido tin segun ley den caso di un tal incumplimento (defecto), ta depende di e condicion cu e consumido ta demanda un tercero prome den un caso;
  5. Bao cual e consumido ta duna e negoshi permiso di antemano pa laga su obligacionnan pasa pa un tercero di e acuerdo cu un di e maneranan menciona den  e ley di deuda y suscripcion di contract (Titulo 2, seccion 3), a menos cu e consumido tin e autoridad pa disolve e acuerdo na cualke momento, of cu e negoshi ta responsabel pa cumplimento door di e tercero,  of cu e transicion ta tuma luga relaciona cu e traspaso di un compromiso na cua tanto e responsabilidadnan como e derechonan ta pertenece;
  6. cu den caso cu e derechonan di e negoshi cu ta sali for di e acuerdo bay pa un tercero, ta exclui of limita autoridadnan of defensanan cu e consumido lo por invoca contra un tercero; 
  7. pa cual un plaso of termino legal den cual e consumido mester haci un derecho conta, ta corta of limita e derecho te menos cu 1 aña;
  8. cu den caso cu durante ehecucion di e acuerdo daño wordo causa na un tercero door di e negoshi of door di un persona of algo pa cual e ta responsabel, e consumido tin e obligacion di sea cubri e daño completamente na un tercero, of mirando e relacion cu e tin cu e negoshi, carga un responsabilidad mayor cu loke ley ta exigi;
  9. cu e negoshi ta duna su mes e permiso pa hisa e prijs cu el a stipula denter di 3 luna despues di a cera e contract, a menos cu e consumido tin autoridad pa den e caso ey disolve e contract;
  10. cu den caso di un acuerdo pa regularmente entrega bienes, incluyendo coriente, of pa haci trabaonan regularmente, esaki ta conduci na prolongacion of renobacion silencioso di un contract pa mas cu 1 aña;
  11. cu ta limita of exclui e autoridad di e consumido pa entrega prueba, of cu ta cambia e reparticion di prueba, manera ley ta stipula, pa pone e consumido den desbentaha, sea pasobra e ta contene un declaracion di e negoshi riba solides di su desempeño, of pasobra cu por prueba culpabilidad di e negoshi pa incumplimento;
  12. cu ta desvia di articulo 37 di Buki 3 den desbentaha di e consumido, a menos cu esaki ta relaciona cu e forma di e declaracionnan cu e consumido tin di duna of cu ta determina cu e adres cu e consumido a duna e negoshi, por sigui wordo considera como tal, te ora notifikele di un adres nobo.
  13. na unda cu na momento cu un consumido cera e acuerdo su adres real ta na Aruba, y e escohe un otro adres, otro cu e caso cu pa un tempo e no lo tin un adres real conoci na Aruba, a menos cu e contract tin di haci cu un bien registra y cu a scohe adres di un notario como lugar di residencia;
  14. cu ta provee pa resolve un conflicto door di un otro cu no ta hues kende pa ley tin e autoridad, of cu no ta un of mas arbito, a menos cu ta duna e consumido un termino di por lo menos un luna despues di cu e negoshi a haci un apelacion por escrito riba e clausula pa scohe pa bay hues.