Huur y huurdo

No obstante cu Aruba conoce un economia di mercado liber, toch Gobierno ta regula e mecanismo riba diferente tereno manera riba tereno di huur. Por medio di Huurcommissie Gobierno ta trata di regula pa un gran parti e condicionnan (prijs di huur, contrato di huur, estado fisico di e cas/ appartment) bao cual e huurmento ta tuma lugar.

Un di e tareanan di Dienst Huur- en Consumentenzaken ta pa duna sosten administrativo na Huurcommissie. Den cuadro di e tarea aki Dienst Huur- en Consumentenzaken ta atende publico cu informacion general relaciona cu huur, intermediacion na momento den caso di un conflicto fuerte entre e inkilino y doño di cas y tambe asistencia pa e peticionnan cu Huurcommissie ta trata manera peticion pa terminacion di acuerdo di huur, calculacion di prijs di huur y aumento di prijs di huur. 

Huurcommissie ta un comision independiente institui pa Gobierno cu ta encarga cu implementacion di ordenansa cu ta reglamenta asunto di huur. Pa servicionan di terminacion di huur, configuracion di prijs y permiso pa aumento di prijs di huur mester pasa via huurcommissie, y mester trece un identificacion valido y informacion relevante pa e caso esta nomber, fam y adres di tanto e inkilino como e doño di cas.

Informacion general

Tanto e inkilino como e doño di cas por tuma contacto cu Dienst Huur- en Consumentenzaken personalmente of na telefon pa pregunta, inkietud of preocupacion relaciona cu e situacion di huur.

Intermediacion

Ora cu tin un disputa entre doño di cas y e inkilino, un di e partidonan por pidi Dienst Huur- en Consumentenzaken pa intermedia y logra yega na un solucion satisfactorio. Den e  caso aki Despacho pa Asunto di Huur ta trata di regla un cita cu ambos partido pa resolve e puntonan di malcontento.

Terminacion di huur

A base di e ordenansa (ley) di huurcommissie no por termina un acuerdo di huur sin permiso di Huurcommissie. Mas cu claro esaki no ta necesario si tur dos partido ta di acuerdo pa termina e acuerdo. Esun cu ta haci e peticion mester busca personalmente un formulario di peticion pa termina  huur.

Calculacion di prijs

Huurcommissie, ta calcula e prijs di huur a base di e balor historico (historische bouwwaarde) di e cas conforme e ordenansa di Huurcommissie pa determina e prijs husto pa huur e espacio. 

Aumento di prijs

A base di ordenansa di huurcommissie por pidi pa aumenta e prijs di huur. Pa esaki mester haya aprobacion di Huurcommissie. Esun cu ta haci e peticion mester busca personalmente un formulario di peticion pa aumento di huur.

 

Huur un cas, apartamento of cualkier otro propiedad inmobil ta encera cera un contract entre dos partido, esta e huurdo (inkilino) cu e doño di cas. E contract aki tin su propio condicionnan, pero contract di huur ta mara na ley tambe. Hopi biaha e contract di huur ta inclui condicionnan pa e huurdo so, pero esaki no ta kita cu pa ley e doño di cas tin cu cumpli cu cierto debernan.

E huurdo mester ta consciente di e huur cu e por paga. Si acaso e entrada di e huurdo desminui, e huurdo mester cuminsa prepara su mes pa tuma decisionnan importante manera esun di busca un otro vivienda pa biba. Pues, mientras e huurdo ta biba den e vivienda e ta mara na cumpli cu su debernan como bon huurdo entre otro e deber di paga e huur. Si acaso e huurdo no por cumpli mas cu su deber di paga huur, e debe di huur lo keda aumenta desproporcionalmente. E aumento di debe aki solamente por crea mas peso riba e situacion financiero di e huurdo. Pesey Dienst Huur- en Consumentenzaken ta conseha e huurdo pa semper cumpli cu su deber di huur.