Conseho relata na Kehonan di Compania y Garashi di Auto

Autogarage kop pic

 

Dienst Huur en Consumentenzaken (DHC) ta trece e siguiente articulo dilanti basa riba cifranan di keho pa cu aña 2018. A observa pa cu aña 2018 e categoria cu a recibi e porcentahe mas halto di keho tabata “Auto y Garashi”. Sinembargo, mester menciona cu despues di a ricibi kehonan, mayoria di compania di auto y garashi a sa di coopera cu DHC y resolve e kehonan exitosamente. DHC kier trece consehonan pa minimalisa e posibilidad cu algo lo bai robes ora ta trata di compra, drechamento of garantia di auto y con e consumido por percura pa e ta fuerte para si algo bai robes toch. 

Siguintemente lo duna conseho riba aspectonan specifico cu a manifesta nan mes den kehonan ricibi na DHC. Den comienso ora ta trata di un acuerdo di compra e cumprado ta paga (na tempo) un prijs y e bendedo ta entrega un product en cambio, asina pasando e propiedad over na e cumprado. Hopi biaha ora ta trata di drechamento di auto esaki ta un poco diferente. Mayoria di biaha e ta un combinacion di un acuerdo di compra y un acuerdo di servicio, caminda cu e garashi di auto ta drecha e auto pa un prijs y alabes ta cumpra of bestel e piesanan cu ta necesario.

Tip 1: (Palabracion y acuerdo nan por escrito)

Palabra por escrito kiko specificamente lo drecha y cua ta e piesa nan specifico cu ta nesecario pa cu esaki. Semper ora ta trata di cambio di piesa, exigi pa entrega e piesa biuew bek despues cu termina e trabou. Tambe ta importante pa stipula un fecha por escrito cu e trabou lo mester ta completa. Si ta posibel, lo ta consehabel pa na momento cu ta entrega e auto pa laga hasi un analisis completo di e auto y raporta esaki por escrito. Palabra di antemano  por escrito cu cualkier trabou extra cu ser constata despues di e palabracion inicial mester un confirmacion por escrito di e consumido prome cu por eherce e trabou extra. Ta conseha pa no hasi acuerdonan verbal paso ta mas dificil pa prueba despues cu tabata tin un acuerdo.

Tip 2: (Periodo di entrega keho)

Semper ta consehabel pa entrega keho asina cu constata algo robes y entrega e keho por escrito preferibel via post, compania di entrega of e-mail. Tin biaha no ta asina simple pa determina un fecha di completacion, por ehempel: Kisas e piesa cu a bestel a dura mas largo pa yega Aruba cu a premira of kisas e no ta den stock actualmente, kisas e trabou a dura mas largo cu a spera. Den tur caso ta importante pa sa cu e consumido no por apela cu locual a wordo entrega no ta conforme e acuerdo, si e no avisa e bendedo of mecanico di e inconformidad mas liher cu ta posibel despues di a descubri esaki of rasonablemente lo por a descubri esaki. Den caso cu e bendedo of mecanico a declara explicitamente cu e piesa of servicio lo tin di cierto propiedadnan y ta resulta cu esaki no ta asina, of den caso cu e bendedo of mecanico tawata sa of por tawata sa di cierto factornan cu ta relaciona cu e inconformidad pero a keda sin informa e consumido di esaki, e aviso di inconformidad dor di e consumido mester sosode mas liher posibel despues cu a descubri e inconformidad. Si bo persona laga bo auto pa mas cu 2 aña na un garage di auto sin avisa pa medio di carta y si nan bisa bo pa busce y bo no cumpli, nan por bai over na cobra bo persona pa warda e auto pabo.

Tip 3: (Recibo)

Semper ta consehabel pa exigi un recibo ora ta trata di cualkier compra of servicio. Den caso di drechamento di auto esaki mester extra atencion. Ora ta trata di drecha auto of ta autorisa e garashi pa cumpra/bestel piesanan di auto, mester zorg pa riba bo recibo ta para specificamente kico a drecha of kico a cumpra. Si riba bo recibo ta para solamente e suma final y un discripcion cu no ta suficiente, esaki lo por ta den bo desbentaha ora problema surgi.

Tip 4: (Garantia)

Nos ta conoce 4 tipo di garantia. “fabrieksgarantie”, “winkelgarantie’, Wettelijke garantie y Bijgekochte garantie”. Garantia di fabrica hopi biaha tin un periodo di 1 pa 2 aña. Esaki ta e garantia cu fabrica ta pone riba e producto. Segun ley si e fabrica no ta situa na Aruba, e compania cu ta importa e product ta esun cu ta keda responsabel pa e producto. Garantia di tienda ta e garantia cu e tienda/compania mes ta pone riba e producto. Garantia legal ta garantia cu ta regla pa ley. Garantia legal kiermen cu e consumido tin e derecho riba un producto bon. Si e consumido a uza e producto na un manera normal y toch e producto ta mustra un defecto cu no ta causa dor di e mal uza di e consumido, e compania mester drecha of cambia e producto. Por ultimo nos ta haya e garantia adicional, esaki ta un garantia cu hopi biaha e consumido mester paga pe. E garantia aki no ta necesario ora ta trata di producto defecto. Unico ora cu por conseha pa cumpra garantia adiconal ta si e garantia ta brinda e consumido mas derecho cu e garantia legal.

Den bo proceso di selecciona un auto nobo pa cumpra, semper tene cuenta cu garantia. Nos por conseha bo persona pa purba di uza e garantia di fabrica como guia. E motibo pa cu esaki ta pasobra companianan hopi biaha ta cumpli cu e garantia di fabrica mas lihe cu garantia legal of garantia di tienda. Sinembargo, mas balor y calidad e auto of piesa tin, mas largo esaki mester funcciona sin problema segun ley. Si bo ta di opinion cu bo auto of piesa no ta conforma e acuerdo, tuma contacto cu e a garashi di auto y trata hunto di yega na un solucion. Si tin cualkier duda, pregunta of mester di intermediacion of conseho legal, por fabor tuma contacto cu nos departamento pa asistencia.

 

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- en Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..">This e-mail address is being protected from spambots. You need JavaScript enabled to view it..

Alerto pa Consumido

8.21.18.-Fraud-Cashiers-Checks

Dienst Huur- en Consumentenzaken (DHC) kier alerta tur consumido riba un movecion cu a ser observa na Aruba.

Ta lo siguiente: Tin un compania cu ta brinda servicio den e area consultorio y servicio financiero cu posiblemente ta mal informa consumidonan tocante e obhetivo di e compania, actuando como specialista den seguro of profesional den ley tanten cu nan no ta autorisa pa duna servicio ariba e tereno aki. E compania aki lo ta acerca victimanan di un accidente di un vehiculo di motor den momento cu esaki ta confundi, agita of posibelmente herida y ta trata di obtene informacion priva di e victima, cu e  meta pa asigura representacion y cobra compensashon pa e servicio aki na e compania di seguro.

Dienst Huur- en Consumentenzaken ta pidi consumidonan pa ta extra atento ora ta divulga informacionan priva. Ta consehabel pa solamente duna informacion priva necesario directamente na un representante di e compania di seguro, of verifica cu e un tercera compania ta trahando pa e compania di seguro. No firma ningun documento sin lesa esaki prome y demanda un copia di tur documento cu bo firma despues di ta di acuerdo cu e contenido.

Si tin cualkier duda of si kier raporta un keho, por fabor tuma contacto cu nos departamento.

Den Memoria di Luciano Maduro

Den memoria di Luciano Maduro

Nos departamento ta di luto cu e fayecimento di nos colega stima, sr. Luciano Maduro.

Luciano tawata un persona hopi profesional, dedica y organisa. E tawata un persona cu ta tuma iniciativa pa cu un projecto, busca solucion pa un problema y semper vocifera su opinion riba un asunto of topico. Ela usa su posicion y voz pa defende e derechonan di consumidor y huurdo, indica violacion di ley y protesta contra e abuso di poder di companianan y verhuurders y educa pueblo riba su derechonan y debernan riba asuntonan di huur y consumidor.

Tambe, Luciano tawata un persona hopi balente, dinamico y creativo. Durante e periodo cu Luciano a traha pa nos departamento ela sa di trece cambionan positivo y progresivo pa e departamento. Dentro di un departamento relativamente chiquito cu un budget y recursonan limita ela sa di saca lo maximo di nos departamento por medio di su halibidadnan y talentonan. Ademas di ta nos chef di asuntonan di consumidor, Luciano tawata tambe vocero pa nos departamento, fotografo, administrador di nos website y pagina di Facebook, redactor di comunicadonan y bon consehero. Bo por bisa cu Luciano tawata un “jack-of-all-trades”. Su trabao, motivacion, inspiracion y esfuerso a contribui grandamente na e profesionalismo di nos servicionan y e productividad di nos departamento.

Nos departamento a perde un tremendo colega y amistad. Su ausencia ta un perdida grandi pa nos departamento, y lo haci falta sigur. Cu nos departamento y henter pueblo di Aruba por conmemora, aprecia y continua e lucha pa informa, educa, conscientisa y proteha e leynan y derechonan riba asuntonan di huur y consumidor, na cual Luciano a contribui inmensamente.

Cu nos colega Luciano sosega na paz.

Di parti di su coleganan di Dienst Huur- en Consumentenzaken y Huurcommissieleden.

 

Dia Mundial di Derecho di Consumido 2019

Dia Mundial di Derecho di Consumidor 2019Dia mundial di derecho di consumido ta un oportunidad pa trece dilanti topico nan di interes pa e consumido.  E fecha aki a keda inspira pa e president Mericano J.F. Kennedy, kende a duna un discurso riba 15 di maart 1962 na e congreso di su pais, den cual e presidente formalmente ta toca e asunto di derecho di consumido.

E fecha aki internacionalmente ta haya atencion specialmente di e organisacion “Consumer International”. Cada aña e organisacion internacional aki ta scoge un tema y e tema pa 2019 ta: “Productonan ‘smart’ cu ta confiabel”. Lesa mas akinan: DiaMundialdiDerechodiConsumido2019.pdf

Follow up caso keho banco

Den cuadro di keho recien contra banco cu a blokia cuenta di cliente Dienst Huur- en Consumentenzaken ta informa

Den cuadro di e caso ultimo di blokiamento di cuenta di banco pa falta di un extracto di censo, Dienst Huur- en Consumentenzaken a revisa:

  • E comunicado cu e banco a saca den medionan di comunicacion;
  • Copia di e carta cu e banco a manda riba e topico pa su cliente (nan);
  • Copia di e condicion nan general di e cuenta coriente di e banco concerni y
  • E ley contra terorismo y labamento di placa.

DOC050617-0001

Ora cualkier negoshi ta saca un comunicado den medionan di comunicacion local, e tin di compronde cu e ta manda informacion pa otro hende tambe cu no necesariamente ta su cliente. Ademas di esaki, un comunicado den medionan local no ta garantisa cu e informacion ta alcansa e cliente. Pa comunica informacion importante pa cliente cu ta afecta e servicio cu e cliente ta uza directamente e banco por scoge pa haci esaki den persona, telefonicamente of via carta/ e-mail. Un comunicado den corant of anuncio na radio of television no ta wordo considera suficiente.

Un otro aspecto ta cu e carta cu e banco a manda pa su clientenan no tabata informa cu lo blokia su cuenta si e no entrega extracto di censo. Cu otro palabra banco a haci un menasa publico pa su clientenan, pero den priva no a splica esaki.

Despues di revisa e ley contra labamento di placa y terorrismo, Dienst Huur- en Consumentenzaken a compronde cu e banco ta mara pa ley pa cumpli cu un identificacion y verificacion, pero cu e ley no ta exclui otro documento pa verifica e identificacion di e cliente. E banco por a pidi otro documento tambe pa cumpli cu ley, pero sinembargo a exigi apenas uno. Si nos bay mas profundo den e materia e ley ta indica cu e banco tin e obligacion di verificacion di e identificacion cliente. Cu otro palabra, e ta un obligacion cu ta solamente di banco! Ademas di esaki, e ley ta indica cu si e banco no por verifica e identificacion di e cliente e lo mester termina e relacion comercial di biaha. E ley no ta bisa cu e banco tin e derecho di blokia e cuenta di banco. Despues di revisa e condicionnan general di e banco, Dienst Huur- en Consumentenzaken a compronde cu blokiamento di cuenta di cliente pa falta di documento no ta aparece den e condicionnan general di e banco. Kiermen cu ni pa ley ni segun nan propio ‘policy’ e banco tabata tin derecho di blokia cuenta di e cliente.

Ademas di e puntonan menciona akiriba mester menciona tambe cu e cliente ta paga e banco pa haci un servicio pe; cu otro palabra e banco no ta bira doño di propiedad monetario di e cliente. E placa di e cliente ta placa di e cliente.

Un otro punto pa considera ta cu e banco como manehado di e placa di e cliente por mira di unda entrada di e clienta ta bin, cuanto e entrada di e cliente ta y tambe unda su entrada ta wordo gasta y por lo tanto cu un poco sentido comun por deduci si su cliente ta laba placa of si ta financia terorismo.

Despues di revisa tur documento menciona akiriba Dienst Huur- en Consumentenzaken a deduci cu e banco a maluza su poder pa di un forma incorecto y desproporcional perhudica su propio cliente.

Si acaso tin mas cliente inocente di terorisimo of labamento di placa pero perhudica pa e decision di e banco aki, por fabor tuma contacto cu Dienst Huur- en Consumentenzaken na 5829914.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..