DHC ta cumpli 20 aña

Dienst Huur- en Consumentenzaken a cumpli 20 aña di Existencia. Diasabra 19 di november 2016 ultimo, Dienst Huur- en Consumentenzaken a cumpli 20 aña di existencia. Antes e tabata conoci manera Bureau Huur- en Consumentenbescherming of popularmente manera huurcommissie. En realidad apenas un di e tareanan di Dienst Huur- en Consumentenzaken ta pa asisti Huurcommissie administrativamente. Dienst Huur- en Consumentenzaken ta atende cliente cu inkietud riba asunto di huur y consumido. Nos ta atende cu informacion general, intermediacion, algun servicio huridico y tambe servicionan di huurcommissie. Servicionan di huurcommissie ta peticion pa terminacion di huur, peticion pa aumento di huur y peticion pa stipulacion di prijs di huur.

Dienst Huur- en Consumentenzaken ta habri di Dialuna pa Diabierna di 7:30am pa 4:30pm pa atende cliente riba pregunta, inkietud, inspeccion of intermediacion cu ta toca asunto di huur of di consumido.

Dienst Huur- en Consumentenzaken su obhetivo ta pa cuida e interes di of brinda proteccion na e consumido mediante control y promocion di comercio husto entre negoshi y consumidor y tambe concientisa e consumido riba su derechonan.  Den cumplimento di su obhetivo principal ta mantene su mes altanto di desaroyonan nacional y internacional. Dienst Huur- en Consumentenzaken ta haci tambe diferente tipo di investigacion di importancia y relevancia pa asunto di huur y consumido.

Den 2015 Dienst Huur- en Consumentenzaken den cuadro di su obhetivo a atende total 2152 cliente. Esaki tabata un aumento di 745 cliente mas compara cu 2014. Den 2015 e lunanan cu mas tanto a registra caso cu problema di huur tabata den e lunanan di Juli te cu November. E lunanan cu relativamente menos caso di huur ta Januari te cu Mei.

Den 2015 e seccion di asunto di consumido a registra 93 keho di consumido. E registracion di keho di consumido ta inclui entre otro e prijs di e producto/ servicio concerni, nomber di e negoshi cu e consumido ta keha y sector comercial di e negoshi. E prijs promedio di tur keho di consumido na 2015 tabata AWG 18581.75 cual ta AWG 7755.24 mas hopi compara cu e promedio di 2014.

Tips pa Pasco 2016

Tips pa consumido prome cu temporada di Pasco

Un consumido ta un persona cu ta haci uzo di servicio of ta cumpra producto pa uzo personal. E consumido ta e actor principal di cualkier economia. Mas hopi e consumido cumpra producto of servicio, mas e economia crece.

Nos tur como consumido ta participa riba mercado sea nos ta cumpra of huur producto of servicio. Nos tur tin beneficio si e reglanan cu ta goberna e mercado ta husto, practico y ta responde na nos necesidadnan.

Di un banda e consumido mester tin confiansa cu e negoshi ta haci comercio husto y honesto. Esaki ta aumenta e confiansa di e consumido den e negoshi local. Di otro banda negoshinan mester tin confiansa cu e reglanan cu ta reglamenta nan operacionnan ta rasonabel y cu nan no ta stroba innovacion y cu nan ta pone tur competencia riba mesun nivel.

A base di kehonan cu a drenta na Dienst Huur- en Consumentenzaken na 2015 por bisa cu e siguiente situacionnan ta causa mas tanto disgusto cerca e consumido na Aruba:

  • Consumido ta cumpra producto defecto. E consumido ta cumpra esaki mas tanto di tienda cu ta bende aparato electronico of tienda cu ta bende material di construccion.
  • E consumido ta experiencia fayo den dunamento di servicio. E consumido ta experiencia e fayo aki di por ehempel companianan di seguro, companianan di servicio di telecomunicacion, garashi di auto y tambe contratista.
  • Varios consumido ta entrega keho contra prijs di producto di comestibel di supermercado.
  • Consumido ta keha contra condicionnan di contract y condicionnan di pago di contract. Esaki ta trata tiendanan cu ta ofrece credito pa compra di mueble, aparato electronico, etc.

Temporada di November y December ta un temporada cu e consumido ta gasta hopi placa na diferente articulo den preparacion y celebracion di Sinterklaas, Pasco y aña nobo. Den cuadro di e temporada aki, Dienst Huur- en Consumentenzaken kier duna algun tips pa e consumido critico:

  • Un bon tip ta pa warda recibo di articulonan importante of articulonan cu prijs ta mas cu AWG 100 pa warda por lo menos 6 luna.
  • Si acaso e consumido kier cumpra un articulo riba krediet, calcula e suma mensual di e krediet be e cantidad di luna y compara esaki cu e prijs cash. Si e prijs total di krediet Sali irasonabelmente mucho halto anto ta miho pa spaar cu cumpra esaki cash.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Segundo parti historia huurcommissie

Segundo parti Historia di Huurcommissie

Manera menciona den un comunicado anterior: “Prome parti riba historia di ley di huurcommissie”, e ordenansa di huurcommissie (HcV) a drenta na vigor como Huurcommissieregeling (HcR) door di e Gouverneur di Antiyas Hulandes, por medio di e decision di 26 di oktober 1939. E motibo directo pa esaki tabata e scarsedad di vivienda na Aruba, cu tabata un resultado di aumento di operacionnan economico di e refineria cu a haci cu e poblacion a aumenta hopi. E HcR tabata trata di proteha e inkilino, door di regula e aumento di prijs di huur y e terminacion di e acuerdo di huur. E HcR a wordo ratifica den e Landsverordening di 11 augustus 1942 y asina a adkiri e status di un Landsverordening. Desde e tempo aki e ley a wordo modifica riba diferente ocasion, di cual e cambio mas importante a sosode di aña 1977, ora e ley a wordo declara aplicabel, banda di Aruba y Corsou, tambe na  otro islanan di Antias Hulandes. Ora Aruba a haya status aparte dentro di Reino Hulandes na 1986, e HcR a keda na vigor a base di articulo 1 di e 'Algemene overgangsregeling wetgeving en bestuur’. E HcR a wordo finalmente retira na momento cu e HcV a drenta na vigor riba 31 januari 1991. 

Mientrastanto e diseño di e amienda pa recodifica e Codigo Civil, cu ta inclui leynan di huur, ta wordo trata na Parlamento di Aruba. E diseño tin como meta pa implementa e ley di huur den buki 7 di Codigo Civil, bao di titulo 4. Na momento cu e amienda di Codigo Civil drenta na vigor, titulo 4 (huur) di buki 7 BWA lo tuma e leynan di huur regla den titulo 7 di buki 7A di codigo civil di Aruba (BWA) over. Ademas lo adopta e reglamento di 'defecto', cu lo mehora e posicion di e inkilino.

Un defecto ta un estado of un caracteristica di un obheto (zaak) of un otro circunstancia cu no por wordo atribui na e inkilino, cu ta haci cu e inkilino no por disfruta di e obheto na un manera cu e por a spera na momento di cera e acuerdo di huur. E doño ta obliga di drecha e defectonan,  riba peticion di e inkilino, a no ser cu esaki ta imposibel of cu ta rekeri gastonan cu, bao di e circunstancianan lo ta irasonabel pa exigi di e doño di cas. E obligacion aki no ta conta pa reparacionnan chikito, ni tampoco pa defectonan pa cual e inkilino mes ta responsabel.

Den caso di reduccion di e placer di huur debi na un defecto, e inkilino por reclama e doño di cas pa un rebaho di e prijs di huur. E reduccion di e prijs di huur mester ta proporcional na e rebaho di placer di huur. Si e defecto ta haci cu e parti esencial di e vivienda inhabitabel, e inkilino tin e derecho pa disolve (ontbind) e acuerdo di huur.

Nederlands Papiamento
Huurder Inkilino
Verhuurder Doño di cas
Zaak Obheto; asunto
Verordening Ordenansa
Landsverordening Ordenansa Nacional
Besluit Decision
Ontbind Disolve
Algemene overgangsregeling wetgeving en bestuur Reglamentacion general di ley y maneho

Tips pa consumido cu cumpra auto cu defecto scondi

Dienst Huur- en Consumentenzaken a ricibi den un luna un par di keho contra e mesun garashi. E keho ta trata un marca di auto cu un agencia di auto renombra ta bende. Cada un keho tabata diferente, pero tur dos auto ta di mas of menos 2 aña bieu. Den cuadro di e kehonan aki, Dienst Huur- en Consumentenzaken kier duna algun tips pa yuda e consumido den situacion similar. Tur dos keho ta cay bao exigencia di conformidad cu ta regla pa ley.

Exigencia di conformidad (of garantia legal) ta e garantia cu ley ta duna e consumido. Garantia legal ta encera cu e producto mester cumpli cu loke rasonabelmente bo por spera di dje (tambe di su duracion) a base di uzo normal di e producto. Garantia legal ta regla den nos Codigo Civil Buki 7. E garantia legal semper ta aplicabel independientemente di esun di fabrica. Garantia legal ta significa cu semper e consumido tin derecho riba un bon producto. Si e consumido a uza e producto di un forma normal y toch aparece fayo cu no ta causa pa desgaste (slijtage), e ora e negoshi mester drecha of reemplasa e producto.

Aki mester menciona cu tin algun factor cu tin influencia riba e garantia legal, manera e “levensduur” (edad cu e producto ta alcansa). Esaki ta e edad maximo cu por spera di e producto, durante cual e producto ta funciona sin problema. Pa por determina esaki, den practica ta considera terminonan indica pa companianan di seguro y fabrica. En general, mas miho e calidad/material, mas halto e prijs, mas renombra e marca, mas largo e edad di e producto lo ta y mas largo por spera cu uza e producto sin problema. Esaki no ta kita afo cu mester tene cuenta si e consumido a cumpli cabalmente cu servicio di mantencion regular of reparacionnan chikito standard.

Den caso di auto kiermen cu si e consumido a cumpli cu su rutina di servicio y a uza e auto manera normal, e  auto tin cu cumpli cu loke rasonabelmente bo por spera di un auto nobo. E garantia legal ta concerni e acuerdo di compra y ta mara e cumprado (consumido) cu e bendedo (negoshi).E bendedo mester entrega un producto cu ta cumpli cu e acuerdo den cual:

  1. E producto mester cumpli cu e caracteristica cu bo lo por spera di uzo normal di e producto.
  2. E cumprado por spera cu e producto tin e caracteristicanan cu e bendedo a priminti.
  3. No solamente e bendedo ta mara na su propio notificacionnan, pero si e fabricante haci cierto promesa den su propaganda, e bendedo tin derecho pa spera cu e producto cumpli cu e promesanan aki.

Ley ta bisa cu e consumido asina cu e constata e daño, e mester avisa esaki cerca e negoshi mas pronto posibel den un termino rasonabel. Den hurisprudencia (‘rechtspraak’) ora ta trata un keho di inconformidad di e producto ta considera como ‘rasonabelmente na tempo’ pa informa e bendedo dentro di 2 luna despues di constata esaki. Un auto ta un producto compleho cu ta consisti di diferente piesa. Pesey e consumido cu cumpra un auto nobo cu fayo scondi mester reclama asina cu e ripara cu e auto tin un fayo. E consumido mester warda informacion di dia cu ela notifica e negoshi y tambe e contesta di e negoshi riba su keho. Pues, dependiendo di e fayo e por ta un poco dificil pa e consumido presenta evidencia cu e auto tin fayo scondi y ki tempo e fayo a inicia. E garashi hopi biaha cu ta para como e unico experto den e marca di auto por    bisa cu e auto no tin ningun fayo y cu ta asina e auto mester funciona.

Pa e motibo aki ta un bon idea pa e consumido laga un experto imparcial diagnostica e situacion di e auto por medio di un rapport por escrito. Ademas ta importante pa e consumido cumpli cu tur e servicionan di mantencion pues esey ta dune mas forsa ora di reclama fayo scondi.

Por ultimo, e consumido mester duna e negoshi e posibilidad pa e mes soluciona e problema. Soluciona e problema ta inclui cu e garashi mes ta reemplasa piesa y/ of ta haci e trabao di reparacion.

Aki bao ta sigui un sumario di traduccion di terminonan huridico of palabranan Hulandes na papiamento uza den e articulo aki.

Nederlands Papiamento
Conformiteitsvereiste Exigencia di conformidad
Consumentenkoop (BW 7) Compra di consumido
Slijtage Desgaste
Levensduur E edad maximo di un producto, por ehempel 2 aña, 5 aña of 10 aña
Rechtspraak Hurisprudencia

Historiahuurcommissie

Prome parti riba historia di ley di huurcommissie

Dienst Huur- en Consumentenzaken a ricibi informacion cu posibelmente varios doño di cas ta haciendo speculacion cu prijs di huur. Dienst Huur- en Consumentenzaken cu entre otro ta mantene supervision y control riba cumplimento di disposicionnan di e ley di huurcommissie ta condena e desaroyo aki. Pues, e ley di huurcommissie ta existi exactamente pa combati speculacion cu prijs di huur.

Pa compronde e ley di huurcommissie, mester wak e historia di e ley esta pakico a bin cu ne. Esaki ta cuminsa na Hulanda despues di prome guera mundial ora e cantidad di construccion di vivienda a cay hopi a consecuencia di scarsedad di material. E propietarionan di vivienda tabata mal uza e necesidad pa vivienda pa hisa e prijs di huur. Gobierno di reino a bin cu e ley di huurcommissie pa combati e hisamento di prijs di huur. E propietario tabata tin mag di hisa e prijs di huur apenas si e por a comproba cu e tabata tin gastonan extra cu e vivienda, manera gasto di mantencion.

Aki na Aruba e ley di huurcommissie cu a keda introduci na 1939 tin mesun efecto pero e supervision ta cay mas tanto riba propiedad cu su balor historico ta menos cu AWG 100.000,- Ademas di prijs e ley di huurcommissie ta regula otro condicionnan di huur tambe. E ley di huurcommissie ta funciona a base di un comision cu ta consisti di tres persona: un presidente, un representante di interes di inkilino y un representante di interes di doño di cas. E leynan cu ta regla asunto di huur y verhuur di onroerende zaken (meubel inmobiliario/ vivienda, edificio, tereno) ta poni den e Codigo Civil di Aruba (BWA) y e Huurcommissieverordening (HcV).

Mediante e Decreto Real di 4 di september 1868 ta stipula cu e Codigo Civil di Antiyas Hulandes lo drenta na vigor riba 1 di mei 1869 pa e colonia di Corsow. E colonia Corsow tabata consisti di Antiyas Hulandes, cu na e momento ey tabata consisti di e tres islanan benedenwinds (Aruba, Boneiro y Corsow) y e tres islanan bovenwinds (Sint Maarten, Sint Eustasius y Saba). Na momento cu e Codigo Civil de Antiyas Hulandes a wordo implementa, a mantene e redaccion Hulandes fuertemente, y a tene poco cuenta cu e necesidadnan local. Cu e entrada di e Codigo Civil nobo (BWA) riba 1 di januari 2002, e acuerdo di huur a wordo poni den buki 7A como acuerdo special.

Den un siguiente comunicado lo trece mas informacion riba e historia y esencia di e ley di huurcommissie. Aki bao ta sigui un sumario di traduccion di terminonan huridico of palabranan Hulandes na Papiamento uza den e articulo aki.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Nederlands Papiamento
Huurder Inkilino
Verhuurder Doño di cas
Huuropzegging Terminacion di huur
Huurprijsverhoging Aumento di prijs di huur
Huurprijsvaststelling Stipulacion di prijs di huur