Resultado Estudio 2

Resultado Estudio Necesidad pa resolve disputa di consumido II: Opinion di empresa

Manera menciona den un comunicado anterior, Dienst Huur- en Consumentenzaken a inicia un investigacion pa midi e necesidad di Pueblo pa bin cu un forma diferente pa resolve disputa di consumido contra negoshi. Un parti di e investigacion aki tabata encera pa haci un encuesta cu empresa pa puntra opinion di empresa riba e topico aki. E encuesta cu empresa a wordo manda via e-mail pa mas di 3000 empresa inscribi cerca Camara di Comercio di Aruba. E encuesta a logra haya un reaccion di 96 empresa y a base di un margen di confiansa di 95% e resultado di e encuesta tin un margen di precision di 9.90%.

Riba e pregunta si e clientenan tabata consumido of empresa, a resulta cu e mayoria (55.2%) tin como cliente tanto consumido como empresa. E segundo pregunta tabata trata con frecuente e empresa ta haya keho di consumido. 53.1% di e empresanan a indica di casi nunca ta haya keho di consumido, 25% a indica cu ta haya keho cu frecuencia normal anto segun 13% di empresa nan nunca ta haya keho di consumido.

Riba e pregunta si e empresa ta di opinion si Aruba tin e necesidad pa un comision di disputa, 84.4% a responde cu sí. Un comision di disputa di consumido ta un comision cu ta consisti di un representante di consumido, uno di empresa y un presidente. Tur miembro di e comision ta dicidi hunto kende tin rason, sea e consumido of e empresa ora presenta un keho di consumido.

Riba e pregunta si e empresa ta di opinion si Aruba tin e necesidad pa un ‘small claims court’, 86.5% di e empresanan a responde cu sí. Un ‘small claims court’ ta un corte cu ta un poco menos formal compara cu un corte normal, menos costoso y cu ta atende demanda (claim/ reivindicacion) di suma chikito.

Riba e pregunta si e empresa tabata haya cu ta existi un necesidad na Aruba pa un forma alternativa pa resolve keho di consumido, sea un comision di disputa di consumido of un ‘small claims court’ e empresanan a indica cu un percentahe di 85.4% cu sí. Bo por bisa cu e empresanan tanto riba comision di disputa di consumido como pa un ‘small claims court’ tabata di opinion cu na Aruba ta existi un necesidad pa esakinan, aunke pa un diferencia hopi chikito mas tanto empresa a escohe  un ‘small claims court’.

Por ultimo, e empresanan tabata tin e posibilidad di duna comentario na final di e encuesta. E comentarionan tabata inclui entre otro indicacion pa un combinacion di un ‘small claims court’ y un comision pa disputa di consumido, ombudsman y tambe necesidad pa renoba henter e procedura legal na Aruba. Un empresa a te hasta duna e comentario: “Right now there’s only justice for those who can afford it”.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Resultado Estudio 1

Resultado Estudio Necesidad pa resolve disputa di consumido I

Dienst Huur- en Consumentenzaken ya desde final di aña 2015 a inicia cu un estudio pa midi e necesidad di Pueblo pa bin cu un forma diferente pa resolve disputa di consumido contra negoshi. Disputa di consumido ta sosode ora un consumido no ta di acuerdo cu un negoshi pa motibo di por ehempel producto cu defecto, garantia, incumplimiento di contract, gastonan di servicio of prijs. Na Aruba ley ta duna e consumido suficiente derecho, pero e consumido tin di exigi su derecho ora algo bay robes. Ora ta trata caso di consumido ta e consumido mes tin di yuda su mes. Con e consumido tin di exigi su derecho ora algo bay robes ta caminda cu hopi di nos como consumido ta haci fout. Ley ta prefera pa e consumido exigi su derecho por escrito, esta via un carta. Asina ki e consumido ta keda cu un prueba cu ela entrega un keho. Entregando un keho ta unda cu e proceso di disputa di consumido ta cuminsa.

Despues cu e consumido manda un carta pa exigi su derecho e mester warda por lo menos dos siman pa e negoshi responde. Si acaso e negoshi keda sin responde of responde cu e no ta acepta e keho, e consumido tin derecho pa sigui busca su derecho cerca Hues. E proceso pa hiba un caso corte ta encera paga pa un abogado, warda pa fecha di tratamento di caso, etc. E gastonan di un abogado ta varia y normalmente e honorario di e abogado ta inclui e gastonan di corte y deurwaarder. Aki mester indica cu nos sistema na Aruba ta ofrece e posibilidad pa hiba un caso dilanti corte sin representacion di un abogado, pero e no ta liber di gasto. Si e consumido representa su mes den corte, toch e lo mester paga gastonan di corte y di deurwaarder.

Bo por bisa cu ta parce comosifuera e situacion na Aruba ta limita e consumido pa yega na su derecho. Algun empresa ta desafia e consumido pa bay Corte, pasobra nan ta convenci cu e consumido lo no bay mas leu cu e caso. Algun consumido pues ta experiencia hopi resistencia di parti di empresa cu tin un actitud arogante contra e consumido.

E consumido cu ta yega cerca Dienst Huur- en Consumentenzaken pa intermediacion kier evita hiba e caso corte y ta busca un conseho of yudansa. E consumido hopi biaha ta duna como remarca cu e proceso pa yega na su derecho ta parce largo y complica. E consumido ta sinti su mes frustra cu e proceso.

Den cuadro di e proceso aki Dienst Huur- en Consumentenzaken a cuminsa cu un investigacion como obhetivo pa averigua si empresa y consumido nan tin necesidad pa un procedura alternativo pa resolve disputa di consumido. E estudio ta den su fase final y por cuminsa publica informacion riba e resultado. Den un siguiente comunicado lo duna mas informacion riba e resultado di e estudio.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Resultado 2015

Den 2015 Dienst Huur- en Consumentenzaken a atende mas cu 2000 cliente!

Dienst Huur- en Consumentenzaken den cuadro di su tarea pa tene supervision y mantene control riba cumplimento di disposicionnan di e ley di huurcommissie y leynan di proteccion di consumido a atende total 2152 cliente den 2015. Dienst Huur- en Consumentenzaken a conoce un aumento den 2015 di 745 cliente mas compara cu na 2014. E cliente ta acerca Dienst Huur en Consumentenzaken pa conseho, intermediacion of pa servicio di Huurcommissie.

E servicionan di huurcommissie ta inclui cancelacion di huur, aumento di prijs di huur y stipulacion di prijs di huur. Den 2015 e lunanan cu mas tanto a registra caso cu problema di huur tabata den e lunanan di Juli te November. E lunanan cu relativamente menos caso di huur ta Januari te cu Mei.

Den 2015 e seccion di asunto di consumido a registra 93 keho di consumido. E registracion di keho di consumido ta inclui entre otro e prijs di e producto/ servicio concerni, nomber di e negoshi cu e consumido ta keha y sector comercial di e negoshi. E prijs promedio di tur keho di consumido na 2015 tabata AWG 18581.75 cual ta AWG 7755.24 mas hopi compara cu e promedio di aña pasa. Keho di consumido ta bini di sector di aparato electronico, servicio di telecomunicacion, construccion, garashi di auto y supermercado. Mayoria keho di consumido ta concerni producto cu fayo scondi; fayo ora di duna servicio; prijs; condicionnan di acuerdo; condicionnan di pago; gastonan extra; producto no ta cumpli cu e ordo e incumplimento di servicio.

E team di Dienst Huur- en Consumentenzaken t’ey di Dialuna pa Diabierna di 7:30am pa 4:30pm pa atende cliente riba pregunta, inkietud, inspeccion of intermediacion cu ta toca asunto di huur of di consumido.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Dia Mundial Consumido 2016

Dienst Huur- en Consumentenzaken ta reflexiona riba dia Mundial di Derecho di Consumido

Dia mundial di derecho di consumido a keda estableci pa prome biaha riba 15 di maart 1983 door di Nacionnan Uni pa promove derecho di consumido rond di mundo. Dienst Huur- en Consumentenzaken kier reflexiona den cuadro di dia mundial di derecho di consumido riba e posicion di e consumido na Aruba. A base di keho di consumido cu ta drenta cerca Dienst Huur- en Consumentenzaken, por bisa cu cada bes mas e necesidad pa tin un forma alternativo pa resolve disputa di consumido ta bira mas obvio.

Dienst Huur- en Consumentenzaken ta atende keho individual di consumido cu conseho y den cierto caso cu intermediacion. Ainda tin varios negoshi cu no ta respeta e derecho cu e consumido tin conforme nos leynan. Aki mester menciona cu ora ta papia di negoshi, kiermen tienda, supermercado, servicio di telecomunicacion, contratista, mecanico, etc.

Dienst Huur- en Consumentenzaken ta boga pa bin cu un of mas forma alternativo di resolve disputa di consumido, cu no ta via corte. Disputa di consumido ta un conflicto cu por presenta entre e consumido cu e negoshi pa diferente motibo, manera entre otro:

  • Negoshi ta nenga di para responsabel (duna garantia) riba benta di producto cu defecto scondi;
  • Negoshi ta inclui condicional general inhusto pa e consumido den contract pa uzo di servicio;
  • Negoshi ta haci promocion falso;
  • Negoshi nunca ta termina trabao segun contract;
  • Negoshi no ta cumpli cu promesanan haci na momento di cumpli cu contract.

Tin diferente forma alternativo cu por atende cu keho di consumido, manera un comision di disputa di consumido of un corta di demanda chikito. E ley di comision di disputa di consumido ainda ta den proceso cerca e departamentonan concerni.

Pesey mientras tanto, Dienst Huur- en Consumentenzaken ta urgi tur consumido na Aruba pa haci uzo consciente y critico di nan rol como consumido. Bo por bisa cu na Aruba ainda tin hopi caminda pa cana prome cu por logra un proteccion di consumido completo. Pero un parti grandi di e proteccion di consumido, ta den man di e consumido mes. P’esey ta importante pa consumidornan di Aruba entre otro siña kico ta na derecho y eherce esakinan.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Consumido mes protehe su mes contra abuso di prijs

Proteccion di consumido kiermen cu e consumido mes ta protehe su mes contra abuso di prijs

Gobierno no ta controla prijs di tur comestibel pasobra Aruba conoce un mercado liber. Esaki significa cu Gobierno ta tene supervision di prijs riba apenas productonan di canasta basico. E canasta basico ta consisti di sucu, koffie, lechi en polvo, lechi di koffie, pan blanco, té, aros, hariña, sucu, cuminda di baby, manteca, margarina, azeta di cushna, webo y pisca. Control di prijs di productonan di canasta basico ta cay bao Directie Economische Zaken. Pa mas informacion riba e prijsnan di producto nan cu ta pertenece na e canasta basico mester tuma contacto cu Directie Economische Zaken.

Mercado liber ta un sistema den cual prijs pa producto y servicio ta liber bao consentimento di bendedo y consumidor, den cual forsa di demanda y suministro ta liber for di intervencion di Gobierno, monopolio di prijs y otro autoridad. E implementacion efectivo di mercado liber ta rekeri pa tin competencia husto. Un mercado eficiente y efectivo ta esencial pa un economia fuerte y stabil, fuente di trabao y abastecimiento di productonan cu ta cumpli cu nos necesidadnan diario y servicionan cu ta defini nos estilo di bida.

E pensamento tras di un mercado liber ta cu tienda ta bende dependiendo di e demanda di e consumido. Pues, e consumido den un sistema di mercado liber ta esun cu poder di compra. Den un economia di mercado liber e demanda di consumido ta determina e benta di producto of servicio riba mercado. Si e consumido stop di cumpra un producto, e tienda lo stop di ofrece e producto den tienda. Den practica kiermen cu si un supermercado ta bende bleki tuna mas caro cu su competidornan, na final e competidornan lo bende mas bleki tuna.

Den un mercado liber cu ta funciona bon e consumido y e negoshi ta yega na otro na un prijs cu ta husto pa tur dos. Pero den un mercado den cual e negoshi ta hopi spierto, e negoshi lo stipula un prijs cu ta combinie mas hopi pensando cu e consumido ta cumpre toch. Si e negoshi ripara cu e consumido ta keda cumpra aunke cu e prijs subi, e negoshi lo keda pusha e prijs pa e subi mas. Esaki ta algo cu por pasa na Aruba si e consumido Arubiano no reclama prijs halto. Si nos como consumido kier reduci aumento di prijs, nos tin di pone cabes hunto y laga producto caro riba shelf para.

Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..