Tips ora di book biahe 2

Tips ora di book biahe (Parti II)

Aki ta sigui mas informacion riba e ley di acuerdo di biahe cual ta trata solamente ora e consumido paga pa un pakete di biahe cu ta inclui un anochi of por lo menos 24 ora y estadia, transporte of un otro sorto servicio turistico significante pa e biahe.

E ley ta bisa cu si acaso e viahe no sosode conforme expectativanan cu e viahero por a spera a base di e e contenido di e acuerdo y su condicionnan, e agencia ta obliga pa indemnisa daño a no ser cu e agencia no ta causante di e falta sino e biahero mes, un tercero of un forsa mayor. E agencia di biahe ta segun e circunstancianan obliga pa duna e biahero ayudo y asistencia si e biahe no sosode segun expectativananan cu por a wordo crea segun e acuerdo. Si e fayo ta ocasiona pa e biahero, e agencia ta obliga pa duna ayudo of asistencia te asina leu cu esaki ta rasonabel. E gastonan den e caso aki ta core pa cuenta di e biahero.

Un otro articulo di e ley ta trata cu e agencia di biahe por dicidi pa te 20 dia prome cu inicio di e biahe hisa e prijs di e pakete pa motivo di aumento den gastonan di transportacion inclusive gasto di gasolin, impuesto of cambio di balor di moneda. E agencia mester duna cuenta di e calculacion di e aumento aki. E biahero tin derecho pa nenga e aumento aki. Si e viahero nenga di acepta e aumento, e agencia por kibra e acuerdo di biahe. E ora e biahero tin derecho riba su placa completo of parcialmente dependiendo si ela cuminsa disfruta di e biahe caba.

Despues cu e biahero a cera un acuerdo di viahe cu un agencia, e por otorga su derechonan na un tercero tanten cu e tercero ta cumpli cu tur e rekisitonan di biahe y basta cu esaki keda haci un tempo rasonabelmente prome cu e biahe tuma luga. Un termino di por lo menos 7 dia prome cu inicio ta ser considera rasonabel. Traspaso di derecho ta pasa solamente por escrito por medio di  un notificacion pa e agencia di biahe door di e ex biahero cu ta pasa su derecho over pa e tercero. E ex biahero y e tercero ta responsabel pa gastonan di e biahe y tambe e traspaso.

Ora ta trata biahe e consumido na Aruba por scoge pa crea su biahe den diferente manera, manera por ehempel directamente via e aerolinea riba Internet of via e agencia di biahe. Aunke e ley di acuerdo di biahe ta trata apenas un pakete di biahe, esaki no kiermen cu e consumido no tin proteccion ora e mes ta haci su reservacion directamente na e aerolinea of ta reserva hotel riba Internet. Cu otro palabra ora e consumido mes arma su pakete di biahe.

Esaki kiermen cu pa cada parti di e biahe cu e consumido paga of reserva separa, otro ley ta conta y pues ta ricibi un otro sorto di proteccion. Na Aruba no tin un ley apart cu ta regla derecho di pasahero den aviacion, manera ta e caso na Hulanda via ordenansa di derecho di consumido (EG) nr 261/ 2004. Pues e reglanan general di acuerdo nan lo ta valido, pero prome cu esaki lo conta kico ta regla den e acuerdo di biahe y tambe e condicion nan general, teniendo na cuenta cu esaki no mag di ta irasonabelmente pisa pa e pasahero (art. 6:231-247 BWA). Ora un vuelo wordo cancela, den principio tin un falta den cumplimento di e acuerdo (incumplimento di contract; art. 6:74 BWA) y como cu cancelacion ta encera cu e acuerdo ta permanentemente imposibel, notificacion di incumplimento ta necesario. Pasahero lo tin derecho riba su placa bek door di terminacion di e acuerdo (art. 6:265 BWA) y indemnisacion di daño pa otro gastonan haci directamente relata y a consecuencia di e cancelacion di vuelo (art: 277 BWA).

Un excepcion riba esaki ta si e cancelacion di vuelo ta a consecuencia di circunstancianan extraordinario cu no por atribui na e aerolinea, por ehempel welga of clima extremo. Den e caso aki e aerolinea mester indemnisa solamente e beneficio cu ela gana y cu e no lo a gana si e vuelo lo a sigui manera acorda (enrikecimento inhusto art 6:78 combina cu 6:212 BWA).

Aki bao ta sigui un sumario di traduccion di terminonan huridico of palabranan Hulandes na papiamento uza den e articulo aki. Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Tips Biahe 1

Tips ora di book biahe (Parti 1)

Den cuadro di luna di vakantie di scol, Dienst Huur- en Consumentenzaken ta saca informacion riba aspectonan importante pa considera ora di book un biahe. Leynan di proteccion di consumido ta regla acuerdo di biahe, pero no ta tur tipo di acuerdo di biahe ta cay bao e ley aki. Asina mes e consumido ta keda cu suficiente proteccion di ley, pero e consumido mester ta alerto.

Prome cu un consumido book un biahe (cu otro palabra cera un acuerdo) e mester ta consciente di e condicionnan na cual e ta mara su mes na dje. Si tur cos bay manera acorda, e condicionnan aki no lo bin na vigor. Pero si algo bay robez, e condicionnan aki ta bira hopi importante.

Ademas di e condicionnan aki, un otro aspecto importante pa e consumido considera ta con nos sistema actual ta regla e keho di un consumido. Pues, aunke nos leynan ta duna suficiente proteccion na e consumido, e consumido mester semper considera cu si mester tin un problema mas tanto ta e mes tin di yuda su mes y busca su derecho. Dienst Huur- en Consumentenzaken por yuda e consumido busca su derecho.

Legalmente (Codigo Civil, Buki 7, art. 500 – 513) un acuerdo di biahe significa un acuerdo den cual un “organisador di viahe” (manera por ehempel un travel agent) ta compromete su mes cu e “viahero” (consumido) pa organisa un biahe di adelanta cu ta encera un anochi of un periodo di mas cu 24 ora, como tambe por lo menos dos di e siguiente servicionan:

  • Transportacion,
  • Estadia,
  • Un otro servicio turistico cu ta un parti significante di e viahe, pero cu no ta relata ni na transportacion of estadia.

E definicion akiriba ta encera cu si por ehempel e consumido book solamente e vuelo via un travel agent, e no ta cay bao proteccion di e ley di acuerdo di biahe. E ora e travel agent ta funciona apenas manera un sorto di intermediador y  e acuerdo cune lo ta un acuerdo di intermediador (bemiddelingsovereenkomst) den sentido di articulo 7:425 BWA. Pues e responsabilidad di e travel agent ey si algo bay robes lo ta limita, a no ser cu tin algo otro specifica riba e condicionnan di e acuerdo. Normalmente, si algo bay robes e consumido lo mester busca su derecho cerca e aerolinea mes. Nada mas cu cada persona of compania, cu den funcion di su negoshi, ta fungi como “mediador” di un organisador di biahe situa aki na Aruba ta wordo considera como e organisador di biahe pa e cu e biahero (art. 7:500 lid 2 BWA).

Nos leynan ta bisa cu den material di promocion di paketenan di biahe, mester aparece e prijs y cualkier otro informacion relevante pa e biahe manera transportacion, estadía of cualkier otro servicio turistico cu ta significante pa e biahe. Prome cu cera e acuerdo di biahe e “organisador di biahe” mester notifica e “biahero” por escrito of cualkier otro forma comprendibel y accesibel tur e informacion aki y tur otro detaye importante pa e biahe. Esaki no ta aplicabel si acaso e acuerdo di biahe a keda cera den menos cu 72 ora prome cu inicio di e biahe (last minute).

Despues di cera e acuerdo di biahe e “organisador di biahe” mester suministra e “biahero” inmediatamente cu un copia di e condicionnan, te asina leu cu esakinan no a keda duna caba.  Prome cu inicio di e biahe e “organisador di biahe” tin deber pa comunica por escrito of di otro forma comprendibel of accesibel tur condicionnan. Aki mester recorda cu e agencia di biahe, aerolinea, hotel, medio di transportacion prome of durante ceramento di e acuerdo mester a notifica e consumido di e contenido di e condicionnan of por lo menos haci referencia unda e consumido por busca e condicionnan pa lesa nan.

Legalmente e “biahero” por termina e acuerdo di biahe na tur momento y de inmediatio bao dos condicion. Si e “biahero” cancela pa motibo di un circunstancia causa di su banda, e biahero ta compensa e agencia e suma cu e agencia a sufri na daño. Circunstancianan causa pa biahero su banda ta por ehempel malesa, famia, trabao, etc. E suma por costa maximo e suma total di e biahe. Si e “biahero” cancela pa motivo di un circumstancia cu no ta su culpa, e tin derecho riba restitucion of remision di e suma di e biahe (prijs di biahe). Si acaso e “biahero” a cuminsa disfruta di e biahe caba, e mester compensa un suma den proporcion di loke ela disfruta di e biahe.

E “organisador di biahe” por cancela e biahe solamente a base di circunstancianan hopi importante y mester avisa e “biahero” di biaha. Si acaso e “organisador di biahe” cancela e biahe pa un motivo cu no tin di haber cu e “biahero”, e ora ey e mester ofrece e “biahero” un otro biahe di mesun calidad of calidad mas halto. Of e “biahero” tin derecho pa haya su placa back of dispensacion di e suma cu e debe si acaso e “biahero” a cuminsa cu e biahe caba.

Den caso di cancelacion di biahe, e “organisador di biahe” tin di recompensa e biahero pa daño material y un suma pa e perdida di e placer di biahe a no ser cu:

E “organisador di biahe” cancela pasobra e no a logra cera e minimo cantidad di persona pa haci e biahe anto e “biahero” a keda avisa por escrito dentro un e termino poni den e acuerdo, of e cancelacion ta a consecuencia di ‘force majeur’ (overbooking no ta inclui).

Den un siguiente comunicado Dienst Huur- en Consumentenzaken lo presenta mas tips pa ora di biahe. Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos w ebsite: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

Resultado opinion di consumido 4

Resultado Encuesta 4: Opinion di consumido

Den e comunicado aki ta sigui cu e resto di resultado di e encuesta riba opinion di consumido pa un forma alternativo pa resolve disputa di consumido. Den e comunicado anterior a menciona cu mayoria cu a contesta e encuesta (74.4%) a responde cu lo kier amplia e sistema pa resolve disputa di consumido. Ademas, 59.3% a responde di ta duna preferencia na un comision di disputa di consumido manera na Hulanda. Un comision di disputa di consumido ta un comision unda cu e consumido por acudi ora e tin un keho contra un negoshi. E comision ta dicidi hunto kende tin rason, sea e consumido of e empresa.

E encuesta cu consumido a keda haci via telefon. Dienst Huur- en Consumentenzaken a logra haya un reaccion di 195  hogar y a base di un margen di confiansa di 95% e resultado di e encuesta tin un margen di precision di 7.01%.

Mester menciona cu algun persona explicitamente a menciona di tin miedo di e proceso di bay corte anto cu ta pesey lo prefera un forma alternativo cu por ta mas accesibel pa resolve cualkier disputa di consumido. Di e personanan cu a indica di kier algo otro, algun a duna preferencia na un combinacion di un comision di disputa di consumido cu un small claims court y/ of mas autoridad pa Dienst Huur- en Consumentenzaken.

Tambe a puntra si e consumido ta haya cu hues ta accesibel mirando gastonan di hiba un caso corte. Riba e pregunta aki 43% a responde cu no ta haya corte accesibel. Anto 26.3% a duna lo siguiente como remarke:

  • Ta haya cu kier mira mas participacion di Gobierno pa haci corte mas accesibel;
  • A duna como sugerencia pa bini cu un sistema den cual e negoshi ta paga pa tur gasto di adelanta anto si acaso e negoshi sali gana ta debolbe su placa;
  • Algun consumido a bisa cu e pregunta ta depende hopi riba e entrada di e consumido. Un consumido cu hopi entrada no lo tin problema di paga pa un abogado y hiba un caso corte compara cu un consumido cu poco entrada si lo tin problema cu esey.

Na final di e encuesta e consumido tabata tin e oportunidad di duna su comentario riba e encuesta. Un consumido por ehempel a opina cu: “El espinazo del pobre es la escalera del rico”. Cu e dicho aki e consumido tabata kier a ilustra cu segun e consumido e negoshi (e rico) ta saca probecho di e pober (e consumido).

Ademas di esaki, e comentarionan mas comun tabata:

  • Algun ta haya cu mester haci e proceso legal mas accesibel pa consumido;
  • Algun ta haya cu mester haci mas propaganda riba leynan di proteccion di consumido;
  • Algun ta haya cu Dienst Huur- en Consumentenzaken mester traha mas estrecho cu otro departamento;
  • Algun consumido ta haya cu e proceso tin di keda igual y cu lo mester haci mas pa haci e consumido mas independiente. Es decir cu e consumido mes por regla cierto cosnan pa su mes.

Keda pendiente, pasobra den un proximo comunicado lo menciona e conclusionnan di henter e investigacion. Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..

DHC ta alerta pa Promocion Falso

Dienst Huur- en Consumentenzaken ta urgi tur consumido pa ta Alerta cu promocion falso. Recientemente Dienst Huur- en Consumentenzaken a ricibi keho di consumido contra un compania cu ta ofrece via carta pa cambia un servicio pa otro gratis. Ademas e promocion ta inclui entre otro cu e consumido por cancela e servicio nobo cualkier momento.

E realidad ta cu asina e consumido scoge pa e servicio nobo e tin di cera un contract di 2 aña. Pues e compania den su carta ta haci promocion falso, especificamente e condicion bao cual ta ofrece e servicio. Promocion falso ta aparece den nos Codigo Civil, Buki 6, titulo 3 bao articulonan 194 te cu 196. Anto e compania en cuestion aki ta falta Buki 6, articulo 194g.

For di articulo 6:194 BWA por deduci e definicion di propaganda como: 'haci of laga haci aviso publico tocante productonan of servicionan ofreci door di e persona cu a publica e aviso of e persona den nomber di cual e a actua den ehecucion di su profesion of negoshi.'

Otro notificacion cu e ley aki ta considera falso ta un notificacion cu den un of otro aspecto ta engañoso (falso) en cuanto su:

  • Naturalesa, composicion, cantidad, capacidad, caracteristicanan of posibilidad nan di uzo;
  • Origen, forma of momento di fabricacion;
  • E tamaño di e provision (voorraad);
  • E prijs of e forma di calcula esaki;
  • Rason of proposito di e oferta;
  • Premionan otorga, certificado of otro baloracion nan di otro partido nan, of declaracion nan haci, terminonan uza scientifico of tecnico, conclusionnan tecnico of estadistica;
  • Cantidad, contenido of tempo di e garantia;
  • Identidad, calidad, habilidad of cualificacion y door di ken, bao ken su mando of guia of cu ken su cooperacion e productonan a keda of ta wordo fabrica of bendi, of e servicionan ofreci;
  • Comparacion cu otro producto of servicionan.

Anuncionan engañoso ta ilegal (onrechtmatig) segun articulo 6:194 BWA. E consumido tin derecho riba compensacion (schadevergoeding) a base di ley di contracto (art. 7:17 y 7:24 lid 1 jo. 6:74-75 BWA), pasobra e benta wordo conclui bao di e condicion cu e producto ta cumpli cu cierto expectativa basa riba e anuncio. Si e producto no ta cumpli cu e expectativa menciona, tin caso di incumplimento (wanprestatie). Den casonan asina e consumido tin tambe e opcion di termina e contracto (ontbinden; art. 6:265 BWA) of di anula (vernietig) esaki a base di engaño (bedrog), abuso di circunstancia (misbruik van omstandigheden; art. 3:44 BWA) of eror (dwaling; 6:228 BWA). 

Dienst Huur- en Consumentenzaken a informa e compania caba di e puntonan cu no ta cuadra cu realidad cu ta promociona den e carta. Den cuadro di e carta aki Dienst Huur- en Consumentenzaken ta urgi Pueblo pa semper ta alerto cu cualkier tipo di promocion. Pues, e miho manera pa evita di ta victima di promocion falso ta di ta critico y pone bon atencion.

Exageracion ta inherente na propaganda. Hopi biaha a calidad y caracteristicanan positivo ta wordo exagera, mientras cu esunnan negativo ta wordo scondi. E limite permiti ta wordo surpasa en todo caso ora cu e aspectonan y caracteristicanan negativo ta wordo scondi of subestima cu ta rasonabel pa asumi cu e consumido promedio, na cual e anuncio ta dirigi, no lo a cumpra of haci uzo di e producto of servicio si e tabata na altura di esaki.

Encuesta Opinion Consumido 1

Resultado Estudio Necesidad pa resolve disputa di consumido III: Opinion di consumido parti 1

Manera menciona den un comunicado anterior, Dienst Huur- en Consumentenzaken a inicia un investigacion pa midi e necesidad di Pueblo pa bin cu un forma diferente pa resolve disputa di consumido contra negoshi. Un parti di e investigacion aki tabata encera pa haci un encuesta cu consumido pa puntra nan opinion riba e topico aki. Den un comunicado anterior a presenta e resultado di e encuesta cu empresa.

E encuesta cu consumido a keda haci via telefon. Dienst Huur- en Consumentenzaken a logra haya un reaccion di 195  hogar y a base di un margen di confiansa di 95% e resultado di e encuesta tin un margen di precision di 7.01%. Riba e pregunta si e consumido ta di opinion si e proceso Legal pa atende keho di consumido lo mester cambia of lo mester keda mescos, 25.6% di esun nan cu a responde a bisa pa mantene e proceso mescos, 74.4% a bisa cu lo kier pa e proceso keda amplia.

Di e 145 personanan cu a responde di ta desea pa e proceso legal keda amplia, 59.3% di nan a indica nan preferencia pa un comision di disputa di consumido, 12.4% a indica un preferencia pa un small claims court y 13.1% a indica un preferencia pa duna Dienst Huur- en Consumentenzaken mas autoridad. Anto 15.2% di e personanan a indica cu lo kier algo otro.

Akibao ta sigui e definicion di e opcionnan menciona akiriba:

  • Comision di disputa di consumido: Un comision di disputa di consumido ta un comision cu ta consisti di un representante di consumido, uno di empresa y un presidente. Tur miembro di e comision ta dicidi hunto kende tin rason, sea e consumido of e empresa ora presenta un keho di consumido.
  • Small claims court: Un ‘small claims court’ ta un corte cu ta un poco menos formal compara cu un corte normal, menos costoso y cu ta atende demanda (claim/ reivindicacion) di suma chikito. Na Hulanda tin un kantonrechter cu ta loke ta parce un small claims court mas hopi cu e diferencia cu si por busca representacion legal di un abogado den un corte di kantonrechter. Otro paisnan Europeo tin loke nan ta yama un vrederechter cual ta un hues, pero hopi informal cu ta tuma decision riba demanda chikito.
  • Mas autoridad pa Dienst Huur- en Consumentenzaken: Mas autoridad pa e DHC ta encera cu e departamento lo por duna advertencia na negoshinan cu cada bes ta keda kibra leynandi proteccion di consumido. Si acaso e negoshinan aki keda ignora e advertencia cu nan haya, lo por impone un multa.

Den un proximo comunicado lo menciona e resto di e resultado di e encuesta cu consumido. Na e articulo aki bo no por adkiri derecho, pero pa mas informacion riba leynan cu ta trata derecho di consumido, haci un keho of registra un abuso contra consumido yama of pasa personalmente na Dienst Huur- & Consumentenzaken na Wayaca 33, tel: 5829914, bishita nos website: www.dhc.aw, “like” nos of conta un anecdota riba facebook, sigui nos via twitter of e-mail nos na This e-mail address is being protected from spambots. You need JavaScript enabled to view it..